وَلَا يَزَالُونَ مُخْتَلِفِينَ

Thursday, March 12, 2009

الناس بقيت فاهمه الإختلاف غلط

عشان أنا بحب فلان ... يبقي لازم أكون متفق معاه في أراءه بنسبة 100%

و مينفعش حتي تكون النسبة 99.9999 %
!!

لازم 100 %

لكن إني الواحد يقول إنه بيختلف مع فلان في النقطة دي عشان السبب ده

ليه و ليه تقول كده !

يعني مثلاً لما أقول إن الشيوخ اللي بتيجي علي قناة الناس أفقدوا كلمة : بحبك في الله معناها
يبقي أنا كده بكرههم
ولكن هذا ليس صحيح

أنا بحبهم كلهم ... و بسمعهم كلهم

بس مش كل كلمة يقولوها أنا لازم أقتنع بيها و أنفذها بالحرف الواحد

لأ طبعا ... أنا أسمع منهم و أخد اللي يقبله عقلي وقلبي معاً

قال النبي صلى الله عليه وسلم قال: استفت قلبك وان افتاك الناس وأفتوك

و عشان الواحد لازم يكون بيفكر ... يبقي لازم هيكون في إختلاف مع الطرف التاني

هو ربنا اللي قال كده : وَلَوْ شَاءَ رَبُّكَ لَجَعَلَ النَّاسَ أُمَّةً وَاحِدَةً وَلا يَزَالُونَ مُخْتَلِفِينَ (118)

ولا يزالون ... فعل مضارع يدل علي التجدد و الإستمرار

يعني الناس هتفضل طول عمرها مختلة مع بعضها
و عمرهم ما هيتفقوا في كا حاجة أبداً
يعني زي ما في حاجة إسمها حب و إتفاق ... في برده حاجة إسمها حب و إختلاف

أنا بحب أ/عمرو خالد جداً ... و متفق مع وجه نظره في الحياة و الدعوة جداً جداً
بس ده برده ما يمنعش إني بختلف معاه في بعض الحاجات اللي هو بيقولها ... وده طبيعي جداً

بس أهم حاجة بأي إن الواحد لما يختلف مع حد يطبق فقه الإختلاف معاه

متستغربش أوي كده .. أه في حاجة إسمها فقه الإختلاف

يعني أعمل إيه بالزبط ؟؟

المفروض تعمل الأتي لما تختلف مع حد :

1-دع الطرف الأخر يتكلم و يعرض قضيته

2-إبدأ الحوار بمواطن الإتفاق .. حتي يكون الحوار هادئاً و هادفاً مش خناقة عالفاضي

3-لا تتعصب لرأيك و لكن قوهٍ بالحجة و البرهان

4-إعتدال الصوت و التواضع في القول و الفعل ... محتاجينها أوي دي

5-التراجع عن الخطأ ... و ذلك يعتبر شجاعة مش معيلة خاااااالص

6-إحترام رأي الآخر ... مهما كان ... و عشرميت خط تحت مهما كان دي

7-لاتصر علي الفوز 100% ... و لكن إسمح لمحاورك بالأحتفاظ بماء وجهه أمامك

ولا إنتو إيه رأيكو ؟؟